„Cooltura“ сега е дел од големото медиумско семејство Clip Media Group

Најголемиот извор на информации од областа на културата и уметноста, интернет-порталот www.cooltura.mk, кој повеќе години е грижливо посветен на овој сегмент од општеството или популарно наречено смета дека културата е кул, сега е дел од големото медиумско семејство „Clip Media Group“.

Како дел од Групацијата на електронски медиуми, која професионално и објективно во јавноста пласира информации, истражувачки стории, видеоматеријали и дебатни и забавни емисии, од сега во интернет-етерот таа ќе им посевети посебно внимание и на културата и уметноста за кои сметаме дека се неправедно запоставени во домашниот медиумски простор.

Заеднички со порталот за култура, ќе се обидеме да информираме, но и да ги негуваме вистинските културолошки вредности за кои како медиумска групација сметаме дека е наша професионална и општествена одговорност. Нема да ги исклучиме и критичките текстови, рецензии, осврти и слично со цел да ги вратиме критичката мисла и релевантните критериуми во културата.

Културата навистина може да биде кул и ние ќе се обидеме со уште подобар дизајн и модерен приод да ја доближиме до нашиот аудиториум.

Се надеваме дека отсега вашето внимане ќе го задржат информациите за филмот, ликовната уметност, музичката дејност, етаблираната, но и онаа андерграунд-култура, а ние ви ветуваме брзина, точност и висока професионалност.